Ka morao ho tswa letsohong le letshehadi: Mong. Thabang Mkhize, Mohokahanyi: Setsi sa ho Ngola, Mof. Simone Du Preez, Toloko ya Puo ya Matsoho, Mong. Mohau Manyarela, Motlatsi wa Molaodi: Yuniti ya Batho ba Qhwadileng, Mong. Letsela Motaung, Ofisiri e ka Sehloohong ya Dipatlisiso: Akhademi ya Botemengata, Yunivesithi ya Foreisetata, Mong. Cleo Maluka, Sethothokisi, Mof. Nomalungelo Mvubu, Toloko ya Puo ya Matsoho, Mong. Rhyno Snyman, Ofisiri ya Ditshebeletso tsa Tshireletso (Rametlae), Mong. Mojalefa Koai, Morupelli wa Phetolelo: Lefapha la Disaense tsa Dipuisano.

Ka pele ho tswa letsohong le letshehadi: Mong. Tseliso Masolane, Motlatsi wa Molaodi wa Nakwana: Ditshebeletso tsa Puo – Lefapha la Dipapadi, Bonono, Botjhaba le Boikgathollo, Mong. Victor Barends, Mosebetsi wa Puo: Sesotho, Mof. Tania Oosthuizen, Mosebetsi e Moholo wa Puo, Ngk. Lehlohonolo Motake, Motlatsi wa Molaodi: Ditshebeletso tsa Puo le Mong. Thatho Phalatse, Moithuti wa selemo sa bone: Lefapheng la Disaense tsa Dipuisano.

Letsatsi la Matjhaba la Phetolelo le ketekwa selemo le selemo ka la 30 Loetse maikemisetso e le ho ananela kabelo e bohlokwa  ya basebetsi ba puo  ho rarolleng dikarohano tse teng tsa dipuo le setso. Ka la 29 Loetse 2023, Yunivesithi e Bohareng ya Thekenoloji, Foreisetata (CUT) e ketekile Letsatsi la Matjhaba la Phetolelo lekgetlo la pele nalaneng ya yunivesithi, mme mokete ona o ne o tshwaretswe khempaseng ya Bloemfontein. Selemong sena, mookotaba wa Letsatsi la Matjhaba la Phetolelo e ne e le “Phetolelo e senola difahleho tse ngata tsa botho”.

Mokete ona o etsahala nakong eo yunivesithi e tokisetsang ho ho hlahloba botjha leano la yona la puo bakeng sa ho kgothalletsa ntlafatso le ho phahamisa botemengata. Leano la Puo la CUT le hlalosa ha Afrikaans, Senyesemane le Sesotho e le dipuo tsa motheo tsa yunivesithi, feela le ha ho le jwalo, yunivesithi e na le maikemisetso le thahasello ya ho ananela le ho phahamisa puo ya matsoho jwalo ka ha e se le e puo ya semmuso naheng ya Aforika Borwa.

Monghadi Tseliso Masolane, Motlatsi wa Molaodi wa Nakwana: Ditshebeletso tsa Puo, Lefapheng la Dipapadi, Bonono, Botjhaba le Boikgathollo o boletse ha phetolelo e se ho fetisa molaetsa ho tswa puong e nngwe ho ya ho e nngwe feela empa phetolelo e thusa ho lokisa le ho ntlafatsa ho se lekalekane ha dipuo ka lebaka la nalane e ileng ya ama ntshetsopele ya dipuo tsa Aforika Borwa. “Re tshwanela ho itlwaetsa ho sebedisa dipuo tsa rona le ho ba motlotlo ka ntshetsopele ya tsona,” ho rialo Mong Masolane.

“Letsatsing lena, ke moo re dumelang le ho bona hore puo ha se mokgwa wa ho fetisa molaetsa feela empa ke mokgwa wa ho utlwisisa, ho utlwisiswa le ho utlwisisana. Jwalo ka ha phihlello ya puo e se taba ya tshwanelo feela, ke tokelo ya mantlha ho batho bohle ho sa natse bokgoni ba bona kapa boqhwala ba bona,” ho rialo Monghadi Mohau Manyarela, Motlatsi wa Molaodi: Yuniti ya Batho ba Qhwadileng. Manyarela o boetsa a bolela hore jwalo ka moetapele wa Yuniti ya Batho ba Qhwadileng o motlotlo ebile o thabile hore ebe ho na le tshebedisano e bonahalang pakeng tsa Yuniti ya Ditshebeletso tsa Puo le Yuniti ya Batho ba Qhwadileng.

Katleho le dihlophiso tsa mokete wa Letsatsi la Matjhaba la Phetolelo o ne o di tlisetswa ke Ditshebeletso tsa Puo, Setsi sa Boqapi Thutong le Thupellong ha mmoho le Lefapha la Disaense tsa Dipuisano.

Uploaded: 29 September 2023